वैदेशिक रोजगारीबाट फर्किएका व्यक्तिहरूका लागि प्रविधि हस्तान्तरण कार्यक्रम सम्पन्न

NayaNaya Khabar
298 दिन अगाडि

मिक्लाजुङ गाउँपालिकामा वैदेशिक रोजगारीबाट फर्किएका व्यक्तिहरूका लागि प्रविधि हस्तान्तरण कार्यक्रम सम्पन्न
मधुमल्ला, १९ असार । मिक्लाजुङ गाउँपालिका रोजगार सेवा केन्द्रद्वारा सञ्चालित वैदेशिक रोजगारीबाट फर्किएका व्यक्तिहरूका लागि पुनःएकीकरण कार्यक्रम (रेमि) अन्तर्गत प्रविधि हस्तान्तरण तथा वितरण कार्यक्रम आज सम्पन्न भएको छ। यस कार्यक्रमले वैदेशिक रोजगारीबाट फर्किएका व्यक्तिहरू र तिनका परिवारलाई उद्यमशिलता विकासका लागि सहयोग पुर्याउने उद्देश्य राखेको छ।

कार्यक्रमको प्रमुख अतिथि मिक्लाजुङ गाउँपालिका अध्यक्ष श्री बबि कुमार राईले वैदेशिक रोजगारीबाट फर्किएका व्यक्तिहरूको पुनःस्थापना र उद्यमशिलता विकासका लागि यस प्रकारका कार्यक्रमहरू महत्वपूर्ण हुने बताए। उनले गाउँपालिकाले आगामी दिनमा पनि यस्ता कार्यक्रमहरूलाई निरन्तरता दिने प्रतिबद्धता व्यक्त गरे।

कार्यक्रममा मिक्लाजुङ गाउँपालिकाका उपाध्यक्ष श्री दिनेश पौडेल, प्रमुख प्रशासकीय अधिकृत अभय कुमार गुप्ता, रोजगार सेवा केन्द्रका रोजगार संयोजक क्षितिज चेम्जोङ, र रोजगार सेवा केन्द्रका कर्मचारीहरूको उपस्थिति रहेको थियो। उनीहरूले वैदेशिक रोजगारीबाट फर्किएका व्यक्तिहरूलाई प्रविधि हस्तान्तरण तथा वितरण गर्दै उनीहरूको उद्यमशिलता विकासमा टेवा पुर्याउने विश्वास व्यक्त गरे।

कार्यक्रमको आयोजना रोजगार सेवा केन्द्रले गरेको हो भने, यस केन्द्रले वैदेशिक रोजगारीबाट फर्किएका व्यक्तिहरूको पुनःएकीकरणका लागि विभिन्न तालिम तथा कार्यक्रमहरू सञ्चालन गर्दै आइरहेको छ।